KASZËBSKÔ JEDNOTA – Sztatut


I DZÉL 
ÒGLOWÉ ROZSĄDZENIA

1.    Stowôra mô pòzwã Kaszëbskô Jednota ë w dalszim dzélu je zwónô Stowôrą.
2.    Terenã dzejaniégò Stowôrë je Pòlskô Repùblika.
3.    Dlô realizacje sztatutowëch célów Stowôra mòże dzejac bùten Pòlsczi Repùbliczi na terenie jinëch państwów, z ùwôżanim dlô môlowégò prawa.
4.    Sedzbą Stowôrë je miasto Gdiniô.
5.    Stowôra mô prawną òsobòwòsc.
6.    Stowôra twòrzi môlowé karna.
7.    Stowôra mòże bëc nôleżnikã krajewëch i midzënôrodnëch òrganizacjów ò szlachùjącëch célach.
8.    Stowôra swòje dzejanié òpiérô na spòlëznowi robòce nôleżników. Do prowadzeniégò swòjëch sprawów mòże przëjimac robòtników. Pasownym òrganã w ti sprawie je Zarząd Stowôrë.
9.    Pòzwa ë symbòle Stowôrë ùżiwają prawny òchrónë.
10.    Kùli razy w tim Sztatuce gôdka je ò „wëszëznach Stowôrë” rozmieje sã bez to òrganë Stowôrë.
11.    Wëszëznë Stowôrë wëpòwiadają swòjã wòlã w fòrmie ùchwôlënków. Ùchwôlënczi wëszëznów Stowôrë, pòdjimóné w sprawach bãdącëch w òbrëmienim jich dzejaniégò, są òbrzészné dlô niższich wëszëznów, a téż nôleżników Stowôrë, chtërnëch tikają sã ne ùchwôlënczi.
12.    Ùchwôlënczi wëszëznów Stowôrë są pòdjimóné zwëczajną wikszoscą głosów przë bëcym co nômni pòłowë nôleżników ùpòwôżnionëch do welowaniégò, chiba, że Sztatut pòdôwô jinaczi. W przëtrôfkù równégò rozłożeniégò głosów rozsądzywô głos prowadnika zéńdzeniégò. Ùchwôlënczi są pòdjimóné w jawnym welowanim, chiba, że krëjamnégò welowaniégò zażądô 1/3 nôleżników, chtërny są na zéńdzenim, abò zarządzy je prowadnik zéńdzeniégò. Ùchwôlënczi Zéńdzeniégò mògą téż bëc ùdbóné w drëdżim czasu, jaczi òstónie wëznaczony w tim samim dniu, nié rëchli jak 15 mënutów pò pierszim czasu, ò czim nôleżi dac wiédzã w òbznôjmienim ò zéńdzenim, bez zdrzeniégò na lëczbã lëdzy, chtërny są ë mają prawò do welowaniégò, zwëczajną wiãkszoscą głosów, z tim, że wëbiéranié Przédnika Stowôrë, a téż zmianë w Sztatuce i rozwiązanié Stowôrë robioné są absolutną wikszoscą głosów.
13.    Wëbiéranié wëszëznów Stowôrë òdbiwô sã w krëjamnym welowanim zwëczajną wiãkszoscą głosów przë bëcym co nômni pòłowë nôleżników, jaczi mają prawò do wëbiéraniégò z tim, że welowanié na Przédnika Stowôrë robioné je absolutną wikszoscą głosów.
14.    Przë dofùlowanim wëszëznów Stowôrë pasowno stosëje sã 11 i 12 pąkt Sztatutu.
15.    Nôleżnicë wëszëznów Stowôrë mògą bëc òdwòłóny bez òrgón, chtëren miôł jich wëbróné abò pòwòłóné. Wniosk ò òdwòłanié mòże bëc zgłoszony bez co nômni 1/3 sztatutowégò składu òrganu abò bez jegò prowadnika. Òdwòłanié nôleżników wëszëznów je robioné w krëjamnym welowanim absolutną wikszoscą głosów, przë bëcym co nômni pòłowë ùpòwôżnionëch, z tim że òdwòłanié Przédnika Stowôrë przëchôdô równo z pòwòłanim nowégò przédnika wiãkszoscą 2/3 głosów przë bëcym co nômni pòłowë ùpòwôżnionëch. Òdwòłanié z fąkcje delegata na Zjôzd Delegatów je nié do zrobieniégò.
16.    Ni mòżno bëc w jednym czasu nôleżnikã ùchwôlënkòdajnégò ë rewizjowégò òrganu.
17.    Kadencjô nôleżników wëszëznów Stowôrë warô òd dnia wëbraniégò do dnia wëbraniégò nôleżników pòstãpny kadencje.

II DZÉL
CÉLE STOWÔRË Ë ÔRTË JICH REALIZACJE

1.    Célã Stowôrë je rozwij nôrodny, òbëwatelsczi ë kùlturowi swiądë Kaszëbów, òchróna jich jãzëka i tradicje, a téż nôùkòwé, pòùczné dzejanié ë na rzecz nôrodnëch, etnicznëch miészëznów a spòlëznów ùżiwającëch regionalnégò jãzëka, wspiérającé rozwij môlowëch pòspólnotów i spòlëznów, z zôkrãżë ùwszãdzeniégò fizyczny kùlturë ë spòrtu, òchrónë nôtërny spôdkòwiznë, jak téż pòpiéranié eùropejsczi jintegracje i rozwiju kòńtaktów ë wespółrobòtë midzë spòlëznama, w tim òsoblëwò:
a)    rozbùdzanié ë ùmòcniwanié nôrodny swiądë Kaszëbów,
b)    òdroda kaszëbsczi kùlturë,
c)    propagòwanié wiédzë ò Kaszëbach,
d)    òchróna etnicznëch prawów lëdzy, jaczi deklarëją przënôleżnotã do kaszëbsczi nôrodnoscë,
e)    sztôłtowanié ë rozwijanié westrzód kaszëbsczégò lëdu aktiwny òbëwatelsczi pòstawë, żëczny pòwstôwanimù wseczëca całownégò rządzeniégò i wespółòdpòwiedzalnotë za swòjã tatczëznã,
f)    stara ò turistné wôrtnotë przë równoczasowi dbie ò rodã Kaszub,
g)    ùwszãdzywanié ë òchróna wòlnotë i prawów człowieka, jak téż òbëwatelsczich swòbòdów a wspòmôganié rozwiju demòkracje,
h)    dzejanié na rzecz eùropejsczi jintegracje, jak téż rozwijaniégò kòńtaktów i wespółrobòtë midzë spòlëznama,
i)    ùtrzëmiwanié kùlturowëch ë ekònomicznëch kòńtaktów ze strzodowiszczã Kaszëbów bez zdrzeniégò na môl mieszkaniégò, a téż pòdtrzëmiwanié westrzód nich emocjonalny zrzeszë z domôcyma stronama,
j)    promòcjô i sztôłtowanié pòzytiwnégò òbrazu Kaszub,
k)    promòcjô zdrowiégò i òchróna zdrowiégò,
l)    promòcjô zdrów jôdë, w tim rëbów ë rëbnëch wërobiznów, jak téż regionalnëch produktów,
m)    òchróna rodë ë promòcjô proekòlogòwégò dzejaniégò.
2.    Stowôra swòje céle realizëje òsoblëwò pòprzez:
a)    programòwé dzejanié,
b)    kùlturalno-pòùczné dzejanié,
c)    nôùkòwé dzejanié,
d)    wëdowné dzejanié,
e)    pòpùlarizatorné dzejanié,
f)    socjalné ë charitatiwné dzejanié,
g)    prowadzenié i pòpiéranié gòspòdarzeniowégò dzejaniégò,
h)    robòtã z młodzëzną,
i)    zakłôdanié ë prowadzenié szkòłów, òstrzódków sztôłceniégò, doùczaniégò i zbëlnianiégò szkólnëch, òstrzódków bezùstónkòwégò sztôłceniégò szkólnëch, a téż jinszich pòùczno-wëchòwnëch ë kùlturalnëch placów,
j)    òrganizowanié lôgrów i kòloniów, jak téż jinëch zortów wëpòczinkù dlô dzecy ë młodzëznë,
k)    wespółrobòtã z òrganizacjama, chtërnëch dzejanié je jistné z célama Stowôrë.    

III DZÉL
NÔLEŻNICË, JICH PRAWA I ÒBÒWIĄZCZI

1.    Nôleżnikama Stowôrë są:
a)    zwëczajny nôleżnicë,
b)    wspiérny nôleżnicë,
c)    hònorny nôleżnicë.
Ti nôleżnicë òrganizacjowò nôleżą do pasownégò karna Stowôrë.
2.    Nôleżnikama Stowôrë mògą bëc òbëwatele Pòlsczi Repùbliczi ë cëzyńcowie.
3.    Zwëczajnym nôleżnikã Stowôrë mòże bëc człowiek òd 16 rokù żëcégò.
4.    Nieùstny wiãcy jak 13 lat stôri:
a)    mògą bëc przëjimóny do karna zwëczajnëch nôleżników Stowôrë za zgòdą jich starszich, abò prawnëch przedstôwców,
b)    ni mają dzejnégò ani pasywnégò welownégò prawa do wëszëznów Stowôrë.
5.    Przëjãcé zwëczajnégò nôleżnika do Stowôrë przëchôdô pò złożenim richtich wëfùlowóny i pòdpisóny deklaracje nôleżnika. Ùchwôlënk w sprawie przëjãcégò do karna nôleżników pòdjimô Zarząd òb czas miesąca òd złożeniégò deklaracje.
6.    Wspiérnym nôleżnikã Stowôrë mòże bëc fizycznô, abò prawnô persóna, jakô przëkłôdô sã do rozwiju Stowôrë, ùznającë céle, chtërne są w Sztatuce. Wspiérny nôleżnicë mògą deklarowac płacenié skłôdków, abò na jiny ôrt wspierac dzejanié Stowôrë. Ùchwôlënk ò danim wspiérnégò nôleżnictwa pòdjimô Zarząd Stowôrë.
7.    Titel hònornégò nôleżnika Stowôrë je nadôwóny bez Zjôzd Delegatów fizyczny persónie w ùznanim za nadzwëkòwé zasłëdżi w dzejanim zgódnym z célama Stowôrë.
8.    Zwëczajny nôleżnicë mają prawò:
a)    brac ùdzél w dzejanim Stowôrë,
b)    zgłôsziwac pòstulatë do wëszëznów Stowôrë,
c)    pasywnégò ë dzejnégò wëbieraniégò do wëszëznów Stowôrë.
9.    Zwëczajny nôleżnicë mają òbòwiązk:
a)    trzëmac sã rozsądzeniów Sztatutu i regùlaminów, jak téż czerowac sã wedle ùchwôlënków wëszëznów Stowôrë,
b)    aktiwno brac ùdzél w dzejanim Stowôrë,
c)    brac ùdzél w robòce pasownégò karna,
d)    wiedno na czas płacëc skłôdczi,
e)    pòczestno prowadzëc spòlëznowé dzejanié w òbrëmienim Stowôrë,
f)    pòczestno i ùtcëwò sprawiac fąkcje pòchôdającé z welacje,
g)    miec starã ò dobré miono Stowôrë.
10.    Lëdze, chtërny zgłosziwają wniosk ò pòwòłanié kragù Stowôrë (nôleżnicë-załóżcowie), jeżlë òb czas skłôdaniégò wnioskù nie są nôleżnikama Stowôrë, ji nôleżnikama stôwają sã z dniã daniégò mòcë ùchwôlënkòwi ò pòwòłanim karna, pò rëchlészim wëfùlowanim ë pòdpisanim deklaracje nôleżnika.
11.    Wspiérny ë hònorny nôleżnicë mają prawò do braniégò ùdzélu w radzenim Òglowégò Zéńdzeniégò Nôleżników z doradnym głosã, a téż z wëjimkã pasywnégò ë dzejnégò welownégò prawa, mają prawa zwëczajnégò nôleżnika.
12.    Wspiérny nôleżnicë mają òbòwiązczi òpisóné w 9 pąkce ze zastrzégą ùriwkù f).
13.    Hònorny nôleżnicë mają òbòwiązczi òpisóné w 9 pąkce z wëjimkã płaceniégò skłôdków.
14.    Nôleżnicë ni mògą nôleżec do òrganizacjów ò procëmnëch célach do célów Stowôrë.
15.    Nôleżnictwò w Stowôrze ùstôwô w przëtrôfkù:
a)    dobrowólnégò wëstąpieniégò zgłoszonégò na papiorze do Zarządu,
b)    wëłączeniégò ze Stowôrë na mòcë ùchwôlënkù Zarządu,
c)    wësztrichnieniégò z registru nôleżników,
d)    smiercë nôleżnika.
16.    Z registru nôleżników Zarząd wësztrichiwô w wëpôdkù niepłaceniégò skłôdków òb czas dwùch lat.
17.    Zawieszenié nôleżnictwa nastãpùje:
a)    na wniosk zgłoszony na papiorze bez samégò zajinteresérowónégò Zarządowi Stowôrë na czas nié dłëgszi jak rok,
b)    na spòdlim ùchwôlënkù Zarządu.
18.    W czasu zawieszeniégò nôleżnik nie kòrzëstô z prawów nôleżnika, jak téż je zwòlniony z òbòwiązkù płaceniégò nôleżnikòwëch skłôdków i braniégò ùdzélu w dzejanim Stowôrë.
19.    Za nietrzimanié sã rozsądzeniów Sztatutu ë regùlaminów, niedopasowanié sã do ùchwôlënków wëszëznów Stowôrë, dzejanié przék célóm Stowôrë, a téż czej je òn òbskarżony ò sromòtné ùczinczi, nôleżnik mòże bëc ùkôróny bez Zarząd.
20.    Zarząd mòże zasądzëc nôleżnikóm nôslédné sztrôfë:
a)    ùpòmnienié,
b)    lôdinga,
c)    òdebranié sprawióny fąkcje,
d)    zawieszenié w prawach nôleżnika na czas do 12 miesący,
e)    wëłączenié ze Stowôrë.
Prawòmòcné zasądzenié sztrôfë zawieszeniégò w prawach nôleżnika je przëczëną stratë nôleżnictwa we wëszëznach Stowôrë.
21.    Człowiek ùkôróny bez Zarząd mô prawò òdwòłac sã do Zjazdu Delegatów òb czas 30 dniów òd datë dorãczeniégò pasownégò ùchwôlënkù. Ùchwôlënk Zjazdu Delegatów je òstateczny.
22.    Zarząd w òdniesenim do prowadników karnów w ùdokôzónëch przëtrôfkach, ùchwôlënkã pòdjãtim absolutną wikszoscą głosów mòże:
a)    wstrzëmac wëkònanié ùchwôlënków ë sczerowac wniosk do Rewizjowi Kòmisje,
b)    òdwòłac prowadnika karna, zarządzëc nową welacjã, ùstanawiającë w jegò plac Kòmisarza do czasu zrobieniégò òb czas 6 miesący nowégò welowaniégò.

IV DZÉL
WËSZËZNË STOWÔRË

1.    Òrganama Stowôrë są:
a) Zjôzd Delegatów,
b) Programòwô Radzëzna,
c) Zarząd,
d) Przédnik Stowôrë,
e) Rewizjowô Kòmisjô.
2.    Kadencjowòsc òrganów Stowôrë wëznacziwô sã na trzë lata.
3.    Zjôzd Delegatów je òrganã Stowôrë òd mòmeńtu ùtwòrzeniégò co nômni 8 karnów, do negò czasu jegò kòmpetencje wëkònywô Òglowé Zéńdzenié Nôleżników. Kùli razy w tim Sztatuce gôdka je ò Zjezdze Delegatów, rozmieje sã bez to téż Òglowé Zéńdzenié Nôleżników.
4.    Zjôzd Delegatów je zwòłiwóny na zwëczajny, abò nadzwëczajny ôrt.
5.    Zjôzd Delegatów na zwëczajny ôrt zwòłiwô Zarząd na co nômni miesąc przed planowónym czasã Zjazdu Delegatów. Zjôzd Delegatów zwòłiwóny na zwëczajny ôrt òdbiwô sã przënômni 1 rôz na rok.
6.    Zjôzd Delegatów na nadzwëczajny ôrt je zwòłiwóny bez Zarząd w célu rozsądzeniégò kònkretnëch sprawów pòdónëch we wnioskù ò zwòłanié Zjazdu Delegatów. Z jinicjatiwą zwòłaniégò Zjazdu Delegatów na nadzwëczajny ôrt mòże wëstąpic Zarząd, abò Rewizjowô Kòmisjô.
7.    Zarząd zwòłiwô Zjôzd Delegatów na nadzwëczajny ôrt, czej je mùsz:
a)    wëbrac Przédnika Stowôrë,
b)    dofùlowac skłôd Rewizjowi Kòmisje ò co nômni 2/3 składu.
8.    Delegatowie na Zjôzd Delegatów są òddelegòwóny bez kòżdé z karnów Stowôrë w propòrcje ùradzony bez Zarząd. Nôleżnicë òrganów Stowôrë, o jaczich je gôdka w pąktach 1b ë c są z ùrzãdu delegatama na Zjôzd Delegatów. Kadencjô delegatów to 3 lata.
9.    Delegatama na Zjôzd Delegatów zwòłóny na nadzwëczajny ôrt są delegatowie wëbróny na slédny Zjôzd Delegatów zwòłóny na zwëczajny ôrt, a téż nôleżnicë òrganów Stowôrë, ò jaczi je gôdka w pąktach 1b, c, d i e.
10.    Jinfòrmacje ò Zjezdze Delegatów delegatóm rozsélô Zarząd na co nômni sztërë tidzenie przed planowónym czasã Zjazdu Delegatów. W przëtrôfkù zwòłaniégò Zjazdu Delegatów na nadzwëczajny ôrt wiadła mùszałëbë òstac rozesłóné na co nômni dwa tidzenie przed planowónym Zjazdã Delegatów.
11.    Programòwą Radzëznã Stowôrë wëbiérô Zjôzd Delegatów. Mòże òna rechòwac òd piãc do dzesãc sztëk lëdzy; ùchwôlënk ò pòwòłanim Programòwi Radzëznë, za kòżdim razã pòdôwô lëczbã nôleżników Radzëznë na ną kadencjã.
12.    Prowadnika Radzëznë wëbiérają z westrzód se nôleżnicë Radzëznë.
13.    Sekretariat Radzëznë zagwësniwô Zarząd Stowôrë.
14.    Programòwô Radzëzna Stowôrë zbiérô sã w czasu midzë Zjazdama Delegatów.
15.    Programòwô Radzëzna ùchwôliwô projektë programów dzejaniégò Stowôrë ë prowadzy dozér nad jich aktualną realizacją.
16.    Zjôzd Delagatów:
a)    ùchwôliwô Sztatut Stowôrë,
b)    ùchwôliwô regùlamin dzejaniégò Programòwi Radzëznë, Zarządu ë Rewizjowi Kòmisje Stowôrë,
c)    ùchwôliwô, na wniosk Programòwi Radzëznë, programã i czerënczi dzejaniégò Stowôrë,
d)    wëbiérô ë òdwòłiwô Programòwą Radzëznã Stowôrë,
e)    wëbiérô ë òdwòłiwô Przédnika Stowôrë ze swòjégò gróna,
f)    wëbiérô ë òdwòłiwô ze swòjégò gróna 3 nôleżników Rewizjowi Kòmisje, a téż na wniosk Przédnika Stowôrë 4-5 persónowi Zarząd, w tim òd jednégò do dwùch Wiceprzédników, Sekretérã ë Kasérã,
g)    ùchwôliwô swój regùlamin,
h)    rozsądzywô kadencjowé sprawòzdania Zarządu ë Rewizjowi Kòmisje, jak téż na wniosk Rewizjowi Kòmisje dôwô Zarządowi absolutorium,
i)    rozsądzywô òdwòłania òd ùchwôlënków Zarządu,
j)    pòdjimô ùchwôlënk ò rozwiązanim abò przesztôłcenim Stowôrë,
k)    rozsądzywô sprawë i pòdjimô ùchwôlënczi w sprawach przedstôwionëch bez wëszëznë Stowôrë, a téż bez delegatów,
l)    ùchwôliwô bùdżet Stowôrë ë zacwierdzywô sprawòzdanié z jegò wëkònaniégò.
17.    Przédnik Stowôrë:
a)    w czasu midzë zéńdzeniama Zarządu czerëje Stowôrą,
b)    reprezentëje Stowôrã,
c)    zwòłiwô zéńdzenia Zarządu, bédëje pòrządk radzeniégò a czerëje jegò dzejanim
d)    ùpòwôżniwô jinszich nôleżników Zarządu do reprezentérowaniégò Stowôrë we wëznaczonym òbrëmienim,
e)    przedstôwiô Zjazdowi Delegatów kadencjowé sprawòzdanié Zarządu.
18.    W skłôd Zarządu wchôdają:
a)    Przédnik Stowôrë,
b)    òd jednégò do dwùch Wiceprzédników Stowôrë, pòwòłóny na wniosk Przédnika Stowôrë bez Zjôzd Delegatów ze swòjégò gróna absolutną wikszoscą głosów,
c)    Sekretéra ë Kaséra, pòwòłóny na wniosk Przédnika Stowôrë bez Zjôzd Delegatów absolutną wikszoscą głosów,
d)    razã Zarząd rechùje nié wiãcy jak 5 sztëk lëdzy.
19.    Zéńdzenia Zarządu zwòłiwô Przédnik Stowôrë co nômni rôz na dwa miesące, abò wiedno na wniosk co nômni 1/3 nôleżników Zarządu.
20.    Zarząd òsoblëwò:
a)    zagwësniwô realizacjã ùchwôlënków Zjazdu Delegatów,
b)    zajimô stanowiszcze w sprawach, chtërne są przedmiotã zajinteresowaniégò Stowôrë,
c)    zwòłiwô Zjôzd Delegatów,
d)    pòwòłiwô przedstôwców abò programòwé karna do realizacje pasownëch zadaniów,
e)    czerëje aktualnym dzejanim Stowôrë,
f)    zacwierdzywô kadencjowé sprawòzdania przëszëkòwóné bez Przédnika Stowôrë,
g)    ùsadzywô regùlamin robòtë Zarządu, z òsoblëwim zdrzenim na zadania Wiceprzédników Stowôrë, Sekretérë i Kasérë,
h)    przëjimô ë wësztrichiwô nôleżników z registru Stowôrë,
i)    pòwòłiwô ë rozwiązywô môlowé karna.
21.    Rewizjowô Kòmisjô je kòntrolnym òrganã Stowôrë.
22.    W skłôd Rewizjowi Kòmisje wchôdô 3 nôleżników. Wëbiérô òna ze swòjégò gróna Prowadnika, jegò zastãpcã a Sekretérã.
23.    Rewizjowô Kòmisjô:
a)    co nômni rôz na rok robi kòntrolã całégò dzejaniégò òrganów Stowôrë, z òsoblëwim zdrzenim na financowé dzejanié, a sprawòzdania z kòntrolë przedstôwiô Zarządowi,
b)    wëstãpiwô do Zarządu z pòkòntrolowima wnioskama,
c)    czerëje wniosczi do Zarządu w wëpôdkù scwierdzeniégò narëszeniégò Sztatutu,
d)    wëstãpiwô na Zjezdze Delegatów z wnioskama w sprawie daniégò absolutorium Zarządowi, jaczi ùstãpiwô,
e)    kòntrolëje dzejanié Zarządu, a téż kòżdégò karna ze swòji jinicjatiwë abò na wniosk Zarządu abò Programòwi Radzëznë,
f)    wëstãpiwô do Zarządu z wnioskã ò zwòłanié Zjazdu Delegatów na nadzwëczajny ôrt.
24.    Zéńdzenia Rewizjowi Kòmisje òdbiwają sã nié rzadzy jak rôz na rok, a ji nôleżnikòwie mają przistãp do wszëtczich dokùmeńtów Stowôrë.
25.    Dokładny spòsób robòtë Rewizjowi Kòmisje òpisywô regùlamin ùchwôlony bez Rewizjową Kòmisjã i zacwierdzony bez Zarząd.
26.    Nôleżnicë Rewizjowi Kòmisje:
a)    ni mògą bëc nôleżnikama Zarządu ani bëc z nima krewny, skrewniony abò słëchac jima w robòce,
b)    ni mògą bëc skazóny prawòmòcnym òbsądã za przesprawã z ùmëslny winë,
c)    sprôwiają swòje fąkcje spòlëznowò ë nie dostôwają z ti przëczënë mita ani zwróceniégò kòsztów.
27.    Zakôzywô sã:
a)    dôwaniégò pòżëczków abò zabezpieczaniégò majątkòwëch òbrzészków Stowôrë w stosënkù do jegò nôleżników, nôleżników òrganów abò robòtników, a téż lëdzy, z chtërnyma robòtnicë są żeniałi, abò w prosti linie krewny abò skrewniony,
b)    przekôzywaniégò majątkù Stowôrë na rzecz jegò nôleżników, nôleżników òrganów abò robòtników, a téż jich blisczich, wedle jinszich reglów jak w stosënkù do trzecëch, a òsoblëwò jeżlë to przekôzanié je robioné za darmôk abò na preferencjowim spòdlim,
c)    wëzwëskiwaniégò majątkù na rzecz nôleżników Stowôrë, nôleżników òrganów abò robòtników, a téż jich blisczich, wedle jinszich reglów jak w stosënkù do trzecëch, wierã że to wëzwëskanié bezpòstrzédno wëchôdô ze sztatutowégò célu Stowôrë,
d)    kùpianiégò na spòdlim apartnëch prawów towarów abò ùsłëżnotów òd òperatorów, w chtërnëch biorą ùdzél nôleżnicë Stowôrë, nôleżnicë ji òrganów abò robòtnicë, jak téż jich blisczi.

V DZÉL
MÔLOWÉ KARNA

1.    Môlowé karna są spòdlecznym òrganizacjowim dzélã Stowôrë, jaczi twòrzi minimùm 5 sztëk nôleżników. Mòżlëwé je bëcé nôleżnikã blós jednégò karna. W kòżdi môlëznie abò dzélu miasta mòże bëc leno jedno môlowé karno.
2.    Nôleżnik Stowôrë mòże miec sã ò przeniesenié do jinégò wëbrónégò bez se karna. Rozsądzenié ò przeniesenim pòdjimô Zarząd. Nen ùchwôlënk Zarząd zarô przekôzywô przënôléżnémù prowadnikòwi karna, z chtërnégò nen nôleżnik sã wëpisôł.
3.    Na pòwòłanié karna zgòdã dôwô abò ji òdmôwiô Zarząd Stowôrë òb czas miesąca òd złożeniégò wnioskù. Òd òdmòwnégò rozsądzeniégò Zarządu w sprawie pòwòłaniégò karna wnioskòdôwôcz mòże òdwòłac sã do Zjazdu Delegatów, jaczégò rozsądzenié je òstateczné.
4.    Z wnioskã ò pòwòłanié karna mògą wëstąpic téż lëdze, chtërny w mòmeńce jegò skłôdaniégò nie są nôleżnikama Stowôrë (nôleżnicë-załóżcowie), z ùznanim rozsądzeniów III Dzélu 10 pąkt negò sztatutu.
5.    Wniosk ò rozwiązanié karna mòże złożëc do Zarządu kòżden nôleżnik Stowôrë. Karno mòże bëc rozwiązóné blós w przëtrôfkù, czej nôleżnicë karna òstro narëszëlë sztatut, ùchwôlënczi wëszëznów Stowôrë abò niechelë sztatutowégò dzejaniégò.
6.    Do kòmpetencjów karnów nôleżi prowadzenié dzejaniégò Stowôrë we wszëtczich sprawach, jaczé są w òbrëmienim zajinteresowaniégò Stowôrë na terenie, na chtërnym dzejô karno, a jaczé nie są w sztatuce zastrzegłé dlô jinszich wëszëznów Stowôrë.
7.    Zéńdzenié nôleżników karna mòże pòdjimac ùchwôlënczi, żlë w zéńdzenim bierze ùdzél co nômni 3/5 nôleżników karna. Ùchwôlënczi w persónowëch sprawach mògą bëc pòdjimóné òb czas bëtnoscë co nômni pòłowë mającëch prawò do welowaniégò.
8.    Kòpiã protokóła ze zéńdzeniégò karna, razã z pòdjãtima ùchwôlënkama, prowadnik karna przekôzywô do Zarządu nôpózni òb czas miesąca òd zéńdzeniégò.
9.    Wëszëznama karna są:
a)    zéńdzenié nôleżników karna,
b)    prowadnik karna, wëbiéróny bez zéńdzenié nôleżników karna absolutną wikszoscą głosów.
10.    Do kòmpetencjów zéńdzeniégò nôleżników karna nôleżi:
a)    wëbranié prowadnika karna,
b)    wëbranié delegatów na Zjôzd Delegatów,
c)    pòdjimanié rozsądzeniów ë ùchwôlënków w sprawach, chtërne w sztatuce nie są zastrzegłé blós dlô jinszich sztatutowëch òrganów Stowôrë, jaczé są w òbrëmienim zajinteresowaniégò Stowôrë na terenie dzejaniégò karna,
d)    zacwierdzywanié programë dzejaniégò karna,  
e)    òbtaksowiwanié dzejaniégò karna,
f)    jiné kòmpetencje, chtërne wëchôdają z negò sztatutu.
11.    Zéńdzenié nôleżników karna, jaczé nie wëbrało delegatów na Zjôzd, w czasu wëznaczonym bez Zarząd Stowôrë, mòże, za zgòdą Zarządu, wëbrac delegatów pò nym czasu.
12.    Do kòmpetencjów prowadnika karna nôleżi:
a)    zwòłiwanié ze swòji jinicjatiwë nié rzadzy jak rôz na 3 miesące abò na pisowné żądanié co nômni 1/3 nôleżników karna nôpózni òb czas 14 dniów òd datë złożeniégò negò żądanego zéńdzeniégò nôleżników karna, bédowanié pòrządkù radzeniégò ë czerowanié jegò radzenim,
b)    repetezentérowanié karna bùten,
c)    jiné kòmpetencje, chtërne wëchôdają z negò sztatutu.

VI DZÉL
MAJĄTK STOWÔRË

1.    Majątk Stowôrë to nierësznotë, rëszné rzeczë, a téż jinszé majątkòwé ë niemajątkòwé prawa.
2.    Zdrojama pòwstôwaniégò majątkù Stowôrë są:
a) skłôdczi nôleżników,
b) zwësk z majątkù,
c) darowiznë i ùdëtkòwienia,
d) spòsobë,
e) zwësk z pùblicznégò dzejaniégò,
f) zwësk z gòspòdarzeniowégò dzejaniégò.
3.    Dlô wôżnoscë òswiôdczeniów wòlë, jak téż wszelejaczich pismionów w òbrëmienim prawów ë òbòwiązków Stowôrë wëmôgóné są pòdpisënczi 2 nôleżników Zarządu.
4.    Dlô wôżnoscë jinszich pismionów ë dokùmeńtów wëmôgóné są pòdpisënczi pasowno Przédnika Stowôrë abò w sprawach tikającëch sã karna – prowadnika karna.
5.    Skłôdczi nôleżników ùchwôliwô Zjôzd Delegatów. Miałëbë òne bëc zapłaconé do kùńca I kwartału kòżdégò rokù. Nowò przëjãti nôleżnicë płacą skłôdczi wedle reglów wëznaczonëch bez Zarząd òb czas 2 tidzeniów òd dostaniégò zaswiôdczeniégò ò przëjãcym nôleżnika.
6.    10% sëmë pòchôdający ze skłôdków nôleżników karno przesélô do 30 czerwińca na kòńto Zarządu Stowôrë.
7.    Stowôra mòże prowadzëc gòspòdarzeniowé dzejanié na òglowëch prawach wëznaczonëch w apartnëch reglach. Zwësk z gòspòdarzeniowégò dzejaniégò Stowôrë służi realizacje sztatutowëch célów i ni mòże bëc dóny do pòdzeleniégò midzë ji nôleżników.
8.    Òbrechòwnym ë rozrechòwnym rokã Stowôrë je kalãdôrzowi rok.
9.    Regle prowadzeniégò financowégò gòspòdarzënkù Stowôrë ùstanôwiô Zarząd.

VII DZÉL
ZMIANA SZTATUTU, ROZWIĄZANIÉ Ë LIKWIDACJÔ
STOWÔRË

1.    Z wnioskã ò zmianã Sztatutu abò o rozwiązanié Stowôrë mòże wëstąpic:
a)    Rewizjowô Kòmisjô,
b)    Zarząd,
c)    Programòwô Radzëzna,
d)    karno co nômni 2/5 nôleżników Òglowégò Zéńdzeniégò Nôleżników Stowôrë abò delegatów na Zjôzd Delegatów.
2.    Sztatut i jegò zmianë, a téż rozwiązanié Stowôrë ùchwôliwóné są bez Zjôzd Delegatów wikszoscą 2/3 głosów przë bëcym co nômni 1/2 delegatów.
3.    W wëpôdkù pòdjãcégò ùchwôlënkù ò rozwiązanim Stowôrë Zjôzd Delegatów pòwòłiwô likwidacjową kòmisjã, jakô przeprowadzy likwidacjã zgódno z ùchwôlónyma wskôzama. Zjôzd Delegatów mòże wskazac òrganizacjã abò jinstitucjã, na rzecz chtërny przeńdze majątk Stowôrë pò przeprowadzenim likwidacjowégò procesu.

Héwòtny Sztatut òstôł przëjãti 4 czerwińca 2011 rokù.

Pòdpisënczi Kòmitetu Załóżców:

Artur Jabłońsczi

Nataliô Lãdowskô

Karól Róda